الحلم الضائع
أعيش ولا أموت.. مبقتش تفرق معايا كتير .. أصل الحياة دى طلعت متسويش
وأحلامى بقت أوهام متهمنيش .. والأصحاب بقوا يا عينى شيش بيش.. وأنا فى الغش مليش .. وغير الحب والأحساس معنديش .. أصل أنا ياما ضحيت كتيير .. ومخدتش ولو مرة حتى بقشيش.
حاولت كتير أتعايش وأجارى .. الحياة أصلاً كرهانى وأنا فى نظرها مساويش
أصلها عايزة عقل خبيث .. وقلب ميت .. وروح قاسيه .. وأنا فى الحكايه دى مليش
دأنا ياما صبرت كتير .. وأستحملت سنيين .. وجيت على نفسى لما كبرت قبل الأوان
وبردوا مرحمتنيش .. أنت مش عارف يا زمان إنى أنثى مش شاويش ؟!
ده قلبى تعب من كتر الخرابيش .. وتوهت بين الحلو والوحش .. ما كل حياتنا بقت تشويش.
طيب أموت بقى ولا أعيش ؟! ولو عشت أعيش تانى ليه ولمين ؟! والدنيا كل يوم بحال .. يوم ليك .. وسنيين عليك .. بتسقينا على طول من كاس المر .. وفى الأخر بردوا .. بتحاسبنا على المشاريب !!
حتى أهالينا مشغوليين .. وبالنفكير على طول مهموميين .. وعلشنا صاحين ومش نايمين والصحاب صعب دلوقتى تلاقيهم .. ولو لقيتهم خلاص مبقوش فاضيين لحد
عايزينك بس وقت فرحك .. وقت خروجك .. وقت سهرك .. لكن تيجى تشتكى يا عينى
متلقيش .. وأنا اللى كنت فاكرة إن الصداقه .. كلمه حلوة .. وعشرة أحلى ..
وضحكه بتجلجل فى قاعده روشه .. وقلب بيخاف على قلب .. وروح مستعده تضحى
عشان روح تانية .. وفى الحزن قبل الفرح متجمعيين .
تارى كل شئ طلع زى البحر .. يوم يكون ليك .. تقدر بهمك تشتكيه .. وبأعلى صوت تنادى على أمواجه يمكن تاخدك .. فى حضنها الدافى .. بس فى يوم تانى .. بيكون للأسف عليك .. لا بيسمعك .. ويزيد فى أمواجه عشان ترعبك .. فتحس بخوف وتهرب منه .. وترجع تانى لوحدتك .
بس دلوقتى قلبى خلاص .. من وهمه فاق وشاف الناس على وشوشها بجد .. بس يمكن بعد ما فات الوقت .. يمكن لأنه لما بيحب .. بيحب فعلاً بجد .. وذكرياته بتفضل مرسومه دايماً بأجمل ورد .. من غير ما يشوف فيها اى شوك .. وجرح أصل انا من الوحدة خلاص زهقت .. والحب الأبدى .. اللى عمرى ما شفته أو عشته .. بقى حلمى بجد .. يمكن ألاقيه فى وقت غير الوقت .. ويمكن أخيراً يقابل بشر بحق .. بيعرفوا الذوق والاحساس .. بيقدروا عقول الناس .. مبيجرحوش أغلى الناس ..قلوب بتنبض دفء .. مفيهاش أى غيرة .. ولا أى نوع من الحقد والكدب حبهم أفعال .. مش مجرد كلام .. طاير زى الدخان .. بحلم طول عمرى .. بحب وأمان زى الصخر .. لا يمكن فى يوم ينكسر أو يتهـد.
بس ده مجرد حلم .. ولا مجرد وهم .. هيحصل بكرة .. ولا بعد ما يكون ضاع العمر؟!
كلمات من اميلى الخاص وغير موجوده غير عندى
الحلم الضائع
كاميليا
حبست انفاسي الى اخر حرف من هذه الخاطرة الرائعه
العرض العادي
